Asisko gutuna
2026ko urria
Ale berezia San Frantziskoren heriotzaren mendeurrenean II
216. zenbakia
Download Asisko Gutuna 216
Asis Sarea eguneroko bizimoduan espiritualtasun frantziskotarra ezagutu edo partekatu nahi duten lagunen sare sozial irekia da.
Duela zortziehun urte, urriaren 3ko larunbat gauean, Frantzisko Asiskoa hil zen. Bere Portziunkulako elizatxo maitean hil zen. Bere anaiez inguratuta zendu zen.
Gogoetarako gaia
Ingurukoek lagunduta hiltzea
Bada Frantziskoren heriotzan ondo aztertu eta aintzat hartu beharreko zerbait. Hil, beti bakarrik hiltzen gara; heriotza prozesu pertsonala eta besterenezina da. Frantzisko ere bakarrik hil zen, baina esan liteke berea “Jaunez jantzitako bakardadea” izan zela.
Frantziskok bere heriotza senidetasun festa handi bat bihurtu nahi izan zuen, eta bertan Jesukristorekiko lotura, Kristoren irudia eta ebanjelioa dira nagusi. Horrela, eta ez beste gisa batera, ulertu eta interpretatu behar da San Joanen ebanjelioa irakurtzeko egin zuen eskaera (13. kapitulua, oinak garbitzeko pasartetik aurrera).
Ez dago esan beharrik Frantziskok nola maite eta zaintzen zituen bere anaiak. Hil baino pixka bat lehenago, bere testamentuan, “nire anaia bedeinkatuak” deitzen die, eta keinu hauek egiten ditu aurrerantzean hartu beharreko bidea erakusteko. Frantzisko bere anaiez inguratuta hil zen.
Baina badago gehiago. Frantziskoren “pazkoaren” kontakizunetan, badago oso polita den eta azpimarratzea komeni den beste datu bat. Frantziskoren heriotzan emakume bat agertzen da: Settesoliko Jakoba. Frantziskoren laguna zen, eta bere egoeraz eta azken unera iristen ari zela jakinarazteko agindu zuen, bera ikustera joateko erregutuz, eta berak egiten zuen gozoki bat, “mostaccioli” izenekoa, ekartzeko eskatuz. Biografoek diotenez, emakumea Portziunkulako Santa Mariara iritsi zen eta Frantziskok bere oheburuaren ondoan onartu zuen, klausura-arau guztiak hautsiz. Frantziskok esaldi jator hau esan zuen: “Zabaldu ateak eta sartu dadila datorrena, emakumeen sarrera debekatzen duen arauak ez baitu balio Jacoba anaiarentzat”.
Frantzisko, beraz, bakarrik hil zen, denok bezala, baina Jesukristok, bere anaiek, Santa Klarako ahizpa txiroek eta Jacoba de Settesoli lagunak lagunduta. Zein gizatiarra!
Biblia pasartea: Erm 8,35-39
Nork aldenduko gaitu Kristok digun maitasunetik? Atsekabeak, larriak, erasoaldiak, goseak, jantzirik ezak, arriskuak, ezpatak? Liburu Santuak dioen bezala: “Zuregatik egunero hilzorian gauzkate; hiltzeko ardiak bezala garabiltzate.”
Baina guztiotan erraz ateratzen gara garaile, maite izan gaituenari esker. Bai baitakit ziur, ez herio eta ez bizi, ez aingeru eta ez goiko beste indar, ez oraingo eta ez geroko, ez inolako botere, ez ortziko eta ez lur azpiko indar, ez inolako beste izakik, ez gaituela aldenduko Jainkoak Jesu Kristo gure Jaunarengan agertu digun maitasunetik.
Frantziskotar espiritualtasuna
Egun batez, Frantzisko dohatsuak lagunei dei egin eta esan zien: «Ondo dakizue zeinen leialtasun eta debozio handikoa zen eta den Settesoliko Jakoba nirekin eta gure Ordenarekin. Horregatik dohain eta kontsolazio handitzat hartuko duela uste dut, nire egoera jakinaraziko bazeniote. Esaiozue batez ere, bidal diezadala erlijiosoentzako jantzia egiteko oihala, errauts-kolorekoa, Zisterko monjeen bezalakoa, eta horrekin batera, Erroman hainbeste aldiz prestatu zidan janari hura». Erromatarrek "mostaccioli" deitzen diote gozoki honi.
Jakoba andreak aita santuak irrikatzen zuen janaria prestatu zion; baina hark gutxi jan zuen, haren gorputza gero eta ahulago baitzegoen gaixotasun larriagatik, eta heriotzatik hurbil. Ekarri zuen oihalaz, berriz, ehorzteko jarri zioten tunika egin zuten anaiek. Eta, jainkoak hala nahita, Jakoba andrea etorri zen aste berean igaro zen jaunarengana Frantzisko dohatsua. (PeLe 8)
Otoitza
Jauna dut artzain: ez zait ezer falta.
Larre guritan etzanarazten nau,
ur baretara eramaten,
eta indarrak berritzen;
bide egokitik narama, leiala delako.
Ibar beltz-ilunetan banabil ere,
ez dut inolako gaitzen beldurrik,
zu nirekin baitzaude:
zure artzain-makilak lasaitzen nau.
Zuk atontzen didazu mahaia etsaien begi aurrean,
ukenduz gantzutzen didazu burua; gainezka dut kopa.
Bai, zorionak eta leialtasunak inguratuko naute
bizitzako egun guztietan;
Jaunaren etxean biziko naiz amaigabeko egunetan.
23. salmoa
2026ko urriko eguneroko Ebanjelioa
Egunero Ebanjelioa irakurri nahi duten lagunek, egun bakoitzari dagozkion irakurgaien arabera, hemen dauzkate erreferentzia guztiak:
1. Lk 10, 1-12 / 2. Mt 18,1-5.10 / 3. Lk 10, 17-24 / 4. Mt 21, 33-43 / 5. Mt 7, 7-11 / 6. Lk 10, 38-42 / 7. Lk 11, 1-4 / 8. Lk 11,5-13 / 9. Lk 11,15-26 / 10. Lk 11, 27-28 / 11. Mt 22, 1-14 / 12. Lk 11, 27-28 / 13. Lk 11, 37-41 / 14. Lk 11,42-46 / 15. Mt 11,25-30 / 16. Lk 12, 1-7 / 17. Lk 12, 8-12 / 18. Mt 22, 15-21 / 19. Lk 12, 13-21 / 20. Lk 12, 35-38 / 21. Lk 12, 39-48 / 22. Lk 12, 49-53 / 23. Lk 12, 54-59 / 24. Lk 13, 1-9 / 25. Mt 22, 34-40 / 26. Lk 13, 10-17 / 27. Lk 13, 18-21 / 28. Lk 6, 12-19 / 29. Lk 13, 31-35 / 30. Lk 14, 1-6 / 31. Lk 14, 1.7-11 /