Geure baitara begiratzea lan betea eta neketsua da. Zer garen ulertzen laguntzen digu, eta ikusarazi egiten dizkigu bultzatzen gaituzten mekanismoak, mugitzen gaituzten errealitateak, hartzen ditugun jarrerak, menpean hartzen gaituzten sentimenduak.
Geure baitara hurbiltzeak lagundu egiten digu, geure gatazkatan dugun erantzukizun-partea ulertzen, besteek ikusten dutenari erreparatzen, gertatzen zaigunaren errua beti besteei ez botatzen.

Dugun izaera eta ahalmenari begiratzeak lagundu egiten digu esker oneko izaten, gauzak onartzen, geure buruari eta besteei behin eta berriz barkatzen. Geure barrura begiratzeak erakutsi egiten digu geure alderik onena eta txarrena, geure dohain handiak eta geure zauri-guneak.
Trebeak gara geure buruari tranpak egiten; geure burua gehiegi maite ez dugunez, inoiz ankerrak gara geure buruarekin; eta besteetan itsuarena egiten dugu, ispiluan ikusten duguna batere gustatzen ez zaigulako. Asko kostatzen zaigu geure buruari neurria hartzen.
Geure buruari begiratzeak pixkanaka hurbildu egiten gaitu geure dugun horretara, geure baitan ustekabeko espazioak irekiz: tokia egiten dio isiltasunari, baita kontenplazioari ere. Toki horietan goaz garena, geure bihotza, aurkituz.
Hor suma dezakegu apurka bizi gaituen presentzia hori, eta hor jar gaitezke apalki eta konfiantzaz Jaikoaren eskuetan. Berorrek, bai, ezagutzen du gure neurria.
Ebanjelioan Jesus Samariako emakumearekin aurkitzen denean, Jesusek hark bizi duena adierazten eta erakusten dio, pupu-leungarririk gabe, baina baita epaitu eta gaitzetsi gabe ere. Emakume samariarrak Jesusen aurpegian ikusten du bere burua eta errealitatea, aurre egin behar dion errealitatea, baina onartua eta konfiantzaz begiratua dela sentitzeak bekatutik liberatzen du. Sendatu egiten du maitasunak.
Geure baitan begiratuz, Hari guri begiratzen uzten badiogu, onartu ahalko dugu garen hori eta borroka egin suertatu zaigunaren alde.
Roger anaiak honela zioen bere otoitzean: “Zuk dugun guztia konprenitzen duzu”. Beraz jar dezakegu geure begirada Harengan, gure bihotzaren neurria ezagutzen duen Harengan.